ممكن الشركات تصرف عليك و انت قاعد فى البيت و تديك الفلوس من غير اي مجهود حقيقي

نصيحة! و كل واحد براحته بعدين ..فى نصباية كبيرة جداااا شغالة الايام دى بتقول: ان ممكن الشركات تصرف عليك و انت قاعد فى البيت و تديك الفلوس من غير اي مجهود حقيقي

** تنبيه جديد: بسبب انتشار الموضوع بطريقة جنونية و اعتراف ناس كتير بانها نصباية فعلا، و انه مفيش شركة .. ففي مجموعة شغالة بتجهز بلاغ باسماء معينة و القائمة مفتوحة لكل المتسببين فى نشر النصباية والبلاغ سيقدم للنيابة العامة و المخابرات العامة، و حسب كلامنا مع محامين الموضوع هيبقى كبير و يندرج تحت بند جرائم النصب والاضرار بالاقتصاد القومى و التخابر مع دولة اجنبية بسبب ملايين الدولارات اللى خرجت من مصر تحت اسم النصباية دى، و هتوصل للسجن لكل من شارك ..

نصابين فكاهيين جدا بيقدموا كلام مقنع ظاهريا و لكن غلط × غلط للى يدور ورا كل معلومة زى اى نصباية فى الدنيا ..

و عشان حرام يضحك عليك، او حتى تورط غيرك فى نصبايه او حتى تكسب فلوس حرام و تقول "انا مالي" و تدعى البراءة و انت عارف اللى فيها .. و تبقى بتهرب من الناس فى الشارع بسبب انك ورطتهم فى الشركة فلو سمحت اقرا الموضوع كويس و شيره ليك و لصحابك لان الموقع ده بالذات %40 من زواره مصريين و في الاف للاسف بتشترك كل اسبوع من مصر و منهم ناس بسيطة جدا

الشركات دي مختلفة تمام عن شركات التسويق الشبكي و ملهاش اي علاقة بيها
باقى الشركات بتبيع منتج حقيقى و الشركة بيكون ليها كيان حقيقى .. لكن فى حالتنا دى مفيش شركة اصلا بالشكل ده!

الايام دى شغالة اوى شركة اسمها GlobadAdMart او LocalAdClick او GlobadAdWorld و بتغير اسمها كل فترة .. المهم بتدفع فيها 500 او 900 او 1300دولار .. عشان تفتح حساب و بتكسب شهريا 200 او 400 او 600 دولار شهريا على حسب ما دفعت فى الاول ..و غالبا الناس بتطمع و تدخل باكاونت تريبل بـ 1300 دولار عشان يكسب الـ 600 دولار شهريا ..

و بتبدأ تشوف 60 اعلان فى الشهر. مدة كل اعلان 30 ثانية يعنى محتاج 30 دقيقة عشان تكسب اكتر من 4000 جنيه شهريا !! غير باقى افراد العيلة لو اشتركت انت و عائلتك +كمان لو جبت ناس تحتك تاخد منها عمولات...

احنا بنتكلم عن 12 او 16 الف جنيه على الاقل ممكن تدفعهالك شركات الاعلانات (بيبسيى و المراعى و شيبسي و HP و Dell و هيونداى وفورد ولامبورجيني ، الخ...) عشان تشوف بس اعلاناتها .. كفاية تشوف الاعلان ومش مهم تشتري المنتج اللي في الاعلان

الكلام كوميدى جدا ..و يثير الف سؤال و سؤال .. لكن النصاب لازم يقدم مبررات قوية بدون معلومة سليمة تبدأ انه يقنعك انه ممكن تكون فى شركات اصلا تقبل تدفع الارقام دى عشان تشوف اعلاناتها و يبدأ بالكلام عن إن اعلان التليفيزيون الشركة بتدفع فيه و محدش بيشوفه و عشان كده قررت تروح تعمل اعلانها بالطريقة الساذجة دي، و كمان يوريك ناس بدأت تكسب فعلا!

للاسف فى ناس كبيرة فى الحوار دى عرفت انها نصب و بتحاول تكسب منك بعد ما بتكون اتورطت او عارف انها نصب من الاول، بس بيفترض انه انصح من الكل و هيبجيب ناس كتير و يلم فلوسه بسرعة .. بيحاول يقنعك، عشان تشترك و يعوض خسارته و يخصم ارباحه من فلوسك من غير ما ينتظر فلوس الشركة، و فى الغالب هيعرض عليك: هات الفلوس و انا افتحلك الحساب برصيد الارباح اللى عندى ..و الناس تقولك "انا قبضت" ، "انا شوفت واحد قبض" ، و غيرها من القصص و هو ما قبضش حاجة من الشركة نفسها و لا حول فلوس للشركة نفسها و بيتعامل مع وسطااء و شبكة كبيرة ..

الفلوس اللى بتشوفها، بياخدها منك و يحطها فى جيبه و يقولك إن الشركة حقيقية .. بدليل ان انا بكسب اهو !! بياخد فلوسك يحطها فى جيبه و يعتبرها مكسب من الشركة و يجيب واحد تانى و تالت و يبعت فلوس للشركة بعد ما يخصم ارباحه ..يعنى فى ناس تجيله ياخد منها الفلوس يحطها فى جيبه و لما رصيده يخلص يبعت للاب لاينز بتاعه او للشركة الفلوس و ياخد هو العمولة .. لكن هل الشركة دفعتله !!؟ ... دى فلوسك و فلوس الناس اللى بيتنصب عليها فى الشبكة الكبيرة دى .. لكن الشركة مش بتدفعله .. بالعكس هو بيبتعلها فلوس و ناس جديدة كل شوية ..

و الدليل المبدئى: ان الشركة مش فاتحة التحويل البنكى اصلا لحد دلوقت!! على الرغم ان ليها سنين على حسب كلامهم .. يعنى شركة قديمة المفروض و تكون حولت مليارات الدولارات لمصر فى السنين اللى فاتت ...

فى بعض الاحيان بتكون شغال مع اب لاينز عايز يحافظ على الشجرة بتاعته و يكمل وقت اطول فى النصباية، فياخد منك 500 دولار و بعد 5 اسابيع يسلمك اول 50 دولار .. و الاسبوع اللى بعده و هكذا .. لو انت مش هتجيب حد مش هيكمل يديك لانك كده قربت تلم فلوسك اللى دفعتها و كده النصبة تتكشف بسرعة .. هو عموما بيدفعلك من فلوسك !! و هنفهم الكلام ده اكتر فى الشرح ..

**********************************شوية ملاحظات مهمة جدااااا .. اقراها كويس و هتفهم ان مفيش شركة اصلا ... و الكلام كله موثق، اللى يقولك كلام مختلف طالبه بعكس الكلام اللى هنا ...
**********************************

اقرا كلامى، كذا مرة و اديله درجة مصداقية 0% و ارجع دور فى النت و اتاكد منه ..